泰國出咗線做順水人情
東南亞錦標賽A組今晚上演最後一輪分組賽，主辦國之一嘅菲律賓主場迎戰泰國，上屆冠軍泰國2戰2勝，已提早穩奪首名出線資格，今仗隨時收起主將休息，留力準備淘汰賽。相反菲律賓必須贏波，先至可以確保晉級，戰意肯定高，加上有國民全力打氣，有望擊退強敵，捧菲律賓主勝。
（Now 671及Fox Sports Play周五晚8時直播）
菲律賓之前兩場分組，分別打和新加坡0比0，逼和印尼2比2，好彩有泰國幫手擊敗新、印二軍，令到菲律賓即使只有2分，都可以排緊第2位，所以今仗只要贏波，就可以出線，形勢並唔太差，尤其係對手泰國可能會放軟手腳，等踢4強，令菲律賓有機可乘。事實上，菲律賓過去3屆都打入4強，更何況今屆係東道主，冇理由分組賽出局咁失威，今仗背水一戰，隨時可以釜底抽薪贏波出線。
新加坡印尼焗攻吼大盤
至於泰國雖然實力勝一籌，但畢竟已經取得首名出線，今場對佢哋而言，只屬例行公事，唔需要搏命，好大機會畀主力休息，就算上陣都會比較錫身，避免受傷。喺戰意差別甚大下，切勿因為泰國係上屆冠軍，而高估佢哋。
同組另一場，新加坡對印尼同時開賽，兩隊都係2戰只得1分，如果今場打和，好可能攬炒一齊出局，所以相信雙方都會豁出搶攻求勝。特別係印尼踢法有前無後，今屆首場同泰國鬥攻，輸2比4，上仗兩度領先下，被菲律賓逼和2比2。包括上屆在內，印尼近5場東南錦分組賽，總入球都達到4球或以上，有呢隊入波保證在場，一定揀中位數2.5球大盤。
（Now 670及Fox Sports Play周五晚8時直播）