出局邊緣 放手一搏
歐聯分組賽進入大直路，4支英超球隊當中，以E組熱刺形勢最危，如果今仗作客摩納哥未能贏波，分分鐘提早出局。好彩熱刺射手哈利卡尼及時回勇，上仗踢出1場精彩逆轉勝，打下一支強心針。摩納哥有大勇嘅法卡奧助陣，主場出擊唔會放過對手，中位數2.5球嘅入球大有2.07倍，絕對屬首選！
（有線61及201台周三凌晨3時45分直播）
先講吓小組形勢，熱刺現時喺E組落後第2位嘅利華古遜2分，如果今仗又失分，而利華作客贏到莫斯科中央陸軍的話，熱刺就會提早畢業，所以呢支倫敦勁旅根本冇得揀，只能豁出去一搏。
無可否認熱刺今季成績略為走樣，包括盃賽在內，早前一度連續7場贏唔到，上仗英超對韋斯咸，亦兩度落後。好在領隊普捷天奴當機立斷，調走毫無表現嘅雲遜贊臣，換入「太極虎」孫興民，結果由射手哈利卡尼充當救世主，臨完場連入兩球，熱刺反勝3比2，證明球隊命不該絕。事實上熱刺人腳唔差，近期成績欠佳，似係心理問題居多，今仗生死戰前夕能及時重響勝鼓，信心絕對會提升。
哈利卡尼法卡奧着晒火
榜首摩納哥領先熱刺4分，換言之今仗和波，就可以穩奪出線權。雖然摩納哥攞1分就完成任務，但主場出擊冇理由求和咁衰仔。摩納哥今季大踢進攻足球，13場法甲轟入39球，近3場比賽更攻入12粒，非常誇張。前鋒法卡奧大翻身，上仗聯賽後備上陣1分鐘即入波，今季法甲已有5球進帳，單計歐聯都入咗4球，今仗要搵食唔難，加上上季喺英超發展唔如意，更加要踢爭氣波。法卡奧同哈利卡尼大鬥射術，可望上演入球騷。