法甲今晚開快車，由巴黎聖日耳門ＰＳＧ喺主場對昂熱。ＰＳＧ現時喺法甲積分榜排第3，落後榜首嘅尼斯1分，如果想成功衞冕聯賽冠軍，嚟緊嘅賽事絕對不容有失。昂熱現時排第10，球隊近兩場聯賽都贏唔到，今仗作客ＰＳＧ相信都係等劏，ＰＳＧ讓球主客和讓2球，照捧2.38倍「讓主」！
（TVB 303周四凌晨4時直播）
ＰＳＧ喺歐聯分組賽已經提早出線，球隊現時可以專心應付本土賽事，近4場聯賽全勝且攻入9球，陣中射手卡雲尼喺呢4場入咗4球，狀態非常好。雖然ＰＳＧ兩位阿根廷中場柏斯托尼同迪馬利亞今仗上陣成疑，但球隊仍有盧卡斯洛迪古斯、馬高華拉堤等好手在陣，要入波絕非難事。昂熱近期表現反覆，近兩場聯賽都贏唔到，而且作客表現亦未如理想，今仗更有中堅安德奧累積滿黃牌停賽，加上前鋒傑基奧方科尼同門將列迪利亞仍然倦勤，喺兵微將寡下造訪志切搶回榜首位置嘅ＰＳＧ，睇怕凶多吉少。
尼斯冇態吼半和
至於榜首嘅尼斯會作客甘岡，尼斯現時僅以1分領先次席嘅摩納哥同第3嘅ＰＳＧ，呢隊波近態麻麻，近5仗只得1勝1和3負嘅成績，加上主力射手巴洛迪利有傷上陣成疑，面對近5仗和咗4場嘅甘岡，未必咁易咬得入。甘岡今仗有守將伊高高及勒梅特因傷倦勤，相信會踢得更保守，一於推介半場和。
（TVB 303周四凌晨2時直播）