形勢險峻冇退路
歐聯嚟到最後1輪分組賽，「死亡B組」形勢極緊湊，賓菲加、拿玻里同比錫達斯僅有1分距離，但只有2隊可出線，所以賓菲加主場鬥拿玻里，成為名副其實生死戰。葡超豪門賓菲加要贏波，先可確保16強席位，相反拿玻里和波都掂，但佢哋以往踢歐聯有「衰收尾」前科，平手盤揀1.82倍嘅「里斯本雄鷹」賓菲加為佳。
（有線61及201台周三凌晨3時45分直播）
兩隊現時同得8分排小組頭兩位，但其實只領先第3位嘅比錫達斯1分，由於比錫達斯今輪作客已篤定包尾出局嘅基輔戴拿模，贏波出線機會甚高。因此如果賓菲加同拿玻里打和，而比錫達斯勝出，賓菲加就會因對賽成績唔及拿玻里，而宣告出局，今仗許勝不許和。
里斯本雄鷹主場6連勝
賓菲加吸取上輪作客領先3球，被比錫達斯逼和嘅慘痛教訓後，今仗應會打醒十二分精神。加上以佢哋主場6連勝，共轟入20球嘅強勢，預料將會圍攻拿玻里。
拿玻里原本可以成為歐聯分組賽史上最快出線球隊，但第3輪輸畀比錫達斯，無緣破紀錄之餘，仲被打窒道氣，之後兩場歐聯都和波，搞到依家仲未穩陣。
拿玻里衰收尾有前科
拿玻里以往踢歐聯都有「衰收尾」前科，最經典係2011/12年球季16強首回合贏車路士3比1，去到次回合踢到加時輸1比4被淘汰，堪稱歐聯「悲情球隊」。拿玻里今場形勢上話就話和波可以出線，但最終好可能事與願違，尤其係佢哋近5次作客葡超球隊，只有1勝2和2負，前景實在唔樂觀，平手盤捧番「里斯本雄鷹」為妙。