今晚英超頭場，利物浦作客般尼茅夫，「紅軍」今季全面復甦，近10仗聯賽錄得8勝2和弗到漏油，就算有主力菲臘比古天奴養傷唔出得，但遇上近4仗聯賽輸咗3仗嘅般茅都冇有怕，客勝不容錯過。
（Now 621及LeSports HK應用程式周日晚9時30分直播）
利物浦經過名帥高普年多以來嘅改造後，已經完全適應「跑轟」打法，包括盃賽在內，近15仗取得12勝3和未輸過，當中近5仗作客亦獲得4勝1和，連造訪「一哥」車路士都贏2比1，未踢今輪之前，紅軍只落後車仔1分，爭標形勢唔錯。儘管進攻核心菲臘比古天奴上仗聯賽對新特蘭傷出，「紅軍」一度久攻不下，但換入嘅奧歷治即建奇功，最終贏2比0，證明利物浦後備席上仲有大把人用，因此比古天奴就算要養傷一段時間，不過呢位巴西國腳近期頻頻撲撲已露疲態，如今高普可多用奧歷治等飢渴感強嘅奇兵，隨時收到奇效。
般尼茅夫殘陣遇強即屈
般尼茅夫畢竟實力一般，往往遇強即屈，今季對3支傳統勁旅曼聯、曼城、阿仙奴，全部輸波收場，睇埋佢哋近5次對利物浦亦全敗，真係未踢已經腳軟，況且舒文、保路錫、史坦尼斯拿斯、查理丹尼斯、路易斯曲克皆因傷缺陣，實力嚴重受削弱，就算有地利亦難抗衡「紅軍」，一於捧客勝。