奧脫福中咒作客嗒糖
「英超曼聯又輸一場」已經過時，依家係「英超曼聯主場又和一場」！因為「紅魔鬼」近4場聯賽主場4連和，上輪即使喪攻韋斯咸最後都開和局，就連中場保羅普巴都懷疑，佢哋係咪被詛咒呀！今輪曼聯造訪「拖肥糖」愛華頓，相信佢哋離開「中咒」嘅奧脫福，表現會有番啲驚喜，心水推介1.88倍嘅曼聯客勝！
（Now 621及LeSports HK應用程式周一凌晨零時直播）
曼聯上輪聯賽以1比1同韋斯咸打成平手，連同早前對史篤城、般尼同埋阿仙奴嘅比賽，單計英超喺「夢劇院」慘逢4連和喇，寫下另一不勝劣績，搞到領隊莫連奴好鬼尷尬！因為球隊對上一次主場4連和，已經係1980至81球季嗰陣，當時頂級聯賽都仲係叫英甲！而且兩軍領隊唔多唔少都有啲心病，因為愛華頓領隊、前巴塞教練團同事朗奴高文成日都對「魔兵」流晒口水！
朗奴高文早前曾經公開講過，有意想收購由荷甲燕豪芬以2,500萬鎊加盟曼聯嘅迪比，雖然眼見呢位荷蘭翼鋒加盟英超後，一直都未能適應比賽節奏，表現同身價唔成正比。不過朗帥就大讚佢係一位個人質素好高嘅球員，需要嘅只係多啲上陣時間。除此之外，朗奴高文又話隨時歡迎朗尼回巢，真係見「魔」就撬。相信一向面子大過天嘅「寸王」，今晚一定會畀番啲顏色佢哋睇！
愛華頓主場冇料到
其實「拖肥糖」最近表現認真一般喇，近3場比賽不勝，當中2場更係交白卷。開季至今13戰攻入16球、失15球，正宗冇前又冇後。而且，佢哋主場威力都唔勁得去邊，勝出率只係得50%咁大把，所以今晚對住一心求勝嘅曼聯，相信都難有作為，曼聯客勝絕對係信心之選。