實在搵唔到其他理由唔撐主隊，所以今日場南韓足總盃決賽次回合ＦＣ首爾對水原藍翼，首爾主場小讓平半即使略嫌太筍，依然照捧1.76倍上盤。
（周六中午12時30分開賽）
由於首回合作客輸咗1比2，首爾今場非贏不可，但係難度唔大，只要小勝1球唔失波，就可以捧盃，成為韓職、韓足盃雙冠王。以佢哋今年嘅聯賽表現，同埋主場往績贏多輸少去計，讓平半真係筍得滯，問題係有邊個敢反呢支季尾踢到着晒火嘅首都球隊先？
水原金主縮皮跌晒Watt
首爾主帥黃善洪話喺呢場公認嘅「Super Match」（超級大戰），佢「唔會要亞軍，一定要贏」，爭勝決心好大。不過，首爾除咗落後1球，龍門劉賢因為首回合响一次角球防禦，故意整傷水原中場李宗成，動作極度粗野，畀足總判罰次回合停賽，而且前鋒丹恩奴域又黃牌夠數坐波監，今場前面搵唔搵到食，完全係睇剛啱傷愈嘅朴主永同卡路士阿祖安奴，的確比較容易畀人嘜死。
但係論球員整體質素，首爾始終略高水原半線，因為對手個背後金主三星電子，今季削減咗投資，成隊波跌咗Watt，變咗中游分子，季尾如果唔係件巴西新兵莊拿芬艾巴里斯杜突然發癲，水原未必有機會入到決賽，唔怪得佢哋個教頭徐正源評論今場波，只敢講句「審慎樂觀」。由於首爾要Win，水原守和都搞掂，前者肯定踢得主動好多，上盤不妨一試。