東南亞錦標賽4強首回合大戰爆發，A組次名印尼憑住「有前冇後」嘅打法，喺死亡之組驚險晉級，今仗佢哋會先喺主場迎戰B組榜首越南，兩支球隊均祟尚進攻踢法，過去每次交鋒都係踢到頭崩額裂、非常燦爛。印尼籍主場之利必貫徹狂攻戰術，一眾攻擊好手亦狀態十足，入球大值博！
（Now 670周六晚8時直播）
印尼喺分組賽攻入6球，同泰國並列為今屆火力最強球隊，但佢哋同時亦係4強入面，唯一一隊得失球出現負數嘅球隊，事關印尼喺3仗分組賽狂失7球，呢種「有前冇後、打死罷就」嘅踢法危險性極高，但既然已成功為球隊拎到出線資格，相信佢哋亦唔會輕易改變踢法。
事實上，印尼嘅荷蘭裔前鋒列利柏尼上仗入波，佢同隊長前鋒蘇羅沙均處於巔峰狀態，要攻陷越南大門問題唔大，由於防線疲弱，以攻為守亦係印尼唯一出路。
印尼過去3次同越南交鋒，合共炮製13個入球，3仗總入球皆喺4球或以上，今場極可能又係一場「入球騷」。