殘缺防線遇正火熱新貴
今晚英超同西甲都有好戲上演，其實意甲都有場重量級大戰，由榜首嘅祖雲達斯主場對近期氣勢如虹嘅阿特蘭大。祖記上輪意外輸波，今仗更有幾位後防主力唔踢得，變得危機四伏；阿特蘭大連贏7場狀態弗到漏，火力強勁就算作客都唔會踢得保守，阿King推介1.72倍入球大。
（TVB 302周日凌晨3時45分直播）
祖雲達斯上仗作客熱拿亞慘負1比3，表現令人失望，尤其係開波僅13分鐘已經畀對手攻入兩球，可見一眾球員喺初段非常唔集中。祖雲達斯今仗回師聯賽7戰全勝嘅主場理應被睇好，問題係球隊日前傳來壞消息，3位防線主力邦路斯、巴沙利同丹尼爾都因傷缺陣，就連基亞連尼亦報稱有輕傷，球隊防線大執位下，就算前線入到波，都好難保到清白之身。
阿特蘭大剛喺周中意大利盃以3比0輕取佩斯卡拉，錄得7連勝，而且佢哋贏佩斯卡拉一役只係派出副選球員應酬，主力前鋒艾真度高美斯同比達拿，以及陣中入球最多嘅中場基斯爾都冇上陣，明顯留力應付今晚呢場重量級大戰。阿特蘭大喺7連勝入面夾埋入咗16球，平均每場起碼入兩粒，今晚相信都唔會踢得保守，捧大盤啱數！
波圖走樣難贏布拉加
其餘推介，葡超球隊塞圖巴爾近況低迷，剛喺葡聯盃作客輸畀低組別球隊華森，今仗作客面對士砵亭都係等劏，讓球主客和就算讓到兩球，都照捧讓球主勝。（周日凌晨2時15分開賽）。
至於波圖近5仗全部和波表現走樣，而且下周中要踢歐聯大戰，布拉加嘅讓球客勝有計。
（周日凌晨4時30分開賽）