搶分趕車場場搏
周中英超開快車，愛華頓今晚將喺主場迎戰阿仙奴，「兵工廠」啱啱喺主場3比1反勝史篤城，喺榜首仍然落後車路士3分排第2位，為繼續力逼車仔每仗都要搏盡。呢支倫敦勁旅作客戰績特別勁，近6仗聯賽作客錄得5勝1和，今仗造訪愛華頓，有力再下一城，捧阿仙奴1.7倍客勝。
（Now 621及LeSports HK應用程式周三凌晨3時45分直播）
阿仙奴傷兵問題已大有改善，兩位前鋒基奧特、盧卡斯佩雷斯已經先後復出，而且有唔錯表現，令球隊鋒力大增。
「兵工廠」繼早前英超作客大炒韋斯咸5比1之後，上周中歐聯作客又大勝巴素利4比1，盧卡斯佩雷斯更加上演帽子戲法，可見作客無礙阿仙奴發揮。再加上阿歷斯山齊士、禾確特、阿歷士張伯倫等進攻球星頻頻有佳作，阿仙奴中前場有人滿之患，各人為爭奪正選，一有機會上陣都會落力爭取表現，有利提升球隊整體演出。
兵工廠近3對戰全勝
愛華頓上仗作客2比3輸畀屈福特，今仗返回主場比賽，未必佔到甜頭。因為包括盃賽在內，「拖肥糖」近5次主場只取得1勝3和1負，其中3次上半場處於落後，比賽過程甚為險峻，加上貴價新兵恩歷克波拿斯重傷提早收咧，戰鬥力再受削弱。
對賽往績方面，愛華頓近3次聯賽對阿仙奴，全敗收場，包括上季主場輸0比2，所以愛華頓今仗即使主場出擊，預料亦無力打破宿命。