抖咗兩周硬晒要Warm Up
於日本舉行嘅世冠盃今日上演2場半準決賽，日韓球隊分途出擊，早場由亞冠盃盟主全北汽車迎戰墨西哥勁旅CF阿美利加。南韓勁旅全北汽車已經抖咗接近兩星期，球員狀態未必十足，今仗需時「熱身」，半場和有2倍分頭值得一試。
（有線61及201台周日下午3時直播）
亞冠盃盟主近3屆出戰世冠盃半準決賽，法定時間都可保持不敗，當中FC廣州（廣州恒大淘寶）更兩次成功打入4強，咁啱呢3場波上半場都係踢成0比0。睇番今屆亞冠代表全北汽車，佢哋自從踢完亞冠盃決賽兩回合後，已經接近兩星期冇正式比賽，作戰鬥心及狀態或唔及之前勇猛。
全北汽車早前喺韓職季後賽後勁不繼，煞科日主場不敵FC首爾0比1，最終失落聯賽錦標，整體演出及信心比季中遜色，估計今仗比賽初段難佔甜頭，相信上半場同對手拉鋸居多。
CF阿美利加愛留前鬥後
中冠盃冠軍CF阿美利加特性慢熱，佢哋喺墨超春季（首階段）聯賽只排第5，但進入季後賽兩回合制，卻先後淘汰瓜達拉哈拉及尼卡沙，而呢4仗上半場都係打和，當中有3次更係互交白卷，可見CF阿美利加踢法極為謹慎，鍾意留前鬥後。事實上，全北汽車同CF阿美利加對上1次碰面係2006年世冠盃，當時半場打和0比0，最後CF阿美利加小勝1比0，今仗隨時歷史重演。