今晚上演嘅意大利超級盃，祖雲達斯同AC米蘭喺中立場卡塔爾多哈交手。「紅黑兵團」AC米蘭變「黑仔兵團」，因航機延誤搞到遲咗1日抵達，球會行政總裁加利安尼嗌晒救命，話影響備戰。反觀祖記一早輕鬆飛到多哈，以逸待勞讓半一，力捧1.82倍祖雲達斯上盤。
（周六凌晨零時30分開賽，馬會網上文字直播）
AC行程遇阻滯蝕晒章
意超盃由上季意甲冠軍對意大利盃盟主，但由於祖雲達斯囊括呢兩項錦標，變成鬥意盃亞軍AC米蘭。今仗勝負最大分野，好可能係場外因素，因為AC搭嘅航機出現故障，搞到遲1日起飛，前晚先到達多哈，行政總裁加利安尼埋怨唔夠時間操練同適應環境，到比賽時好蝕章。
祖記周二已抵達多哈，仲獲得喺當地搵食嘅名將沙維探班，備戰時間充裕。事實上近4屆意超盃祖記擸咗3屆，可見佢哋對呢個盃好重視。何況祖記意甲首循環作客0比1不敵AC，今次仲唔有仇報仇，砌低對手兼捧盃咩。