史巴列堤患恐祖症
今晚意甲爆發榜首大戰，衞冕班霸祖雲達斯主場鬥「二哥」羅馬！祖記今季聯賽主場8戰8勝，簡直無懈可擊，加上「雌狼」羅馬教練史巴列堤一向有「恐祖症」，呢位光頭主帥教波生涯21次領軍對祖雲達斯，僅得1勝3和17負，今次可以話九死一生，一於捧祖記1.59倍主勝。
（TVB 302周日凌晨3時45分直播）
祖雲達斯現時以4分優勢領先次席嘅羅馬，為咗盡快奠定捧盃基礎，今仗正好趁「無敵主場」強勢，擊敗呢支主要爭標對手。睇番祖記今季11場主場賽事，除咗2場歐聯打和之外，其餘都贏晒，包括8仗聯賽主場全勝，其中5場更淨勝對手2球或以上，贏得好有說服力。睇埋「斑馬兵團」近6次主場交手贏晒羅馬，數據佔絕對優勢。
祖記主場無敵贏往績
祖記射手保羅戴巴拿已經傷愈，加上大勇嘅希古恩、文迪蘇斯，3大神鋒可以輪流上陣，勢必令羅馬防線難以招架。雖然祖記中堅邦路斯養傷，但代替佢位置嘅魯加尼表現出色，近3場比賽有2場取得入球，成為祖記後上殺手。
羅馬上輪主場以1比0小勝AC米蘭，但卻付上沉重代價，後防主力般奴皮利斯因足踝受傷要抖3星期，前鋒托迪同穆罕默德沙拿亦因病及傷患上陣成疑。不過，最大「不利因素」其實係教練史巴列堤，因為佢教練生涯鬥「斑馬兵團」，輸波率高達81%，明顯對呢支宿敵束手無策。加上羅馬今季8場聯賽作客只有3勝2和3負，仲差過阿特蘭大，今仗造訪都靈，睇怕冇運行。