今日澳職繼續有賽事上演，墨爾本勝利主場鬥中岸水手，兩隊近況「天與地」，墨爾本勝利狀態大勇，近5仗取得4勝1和，全力追趕榜首FC悉尼，銳不可當。反觀中岸水手3連敗，而且往往一早失波，毫無鬥志可言，睇怕今仗連上半場都頂唔住，首選墨爾本勝利1.55倍半場主勝。
（有線64及203台周三下午4時50分直播）
墨爾本勝利暫時落後榜首嘅ＦＣ悉尼10分之多，但其實佢哋踢少兩場，所以實際上僅比對方失多4分，仍然有機會後來居上，當然首先要確保未來賽事可以贏波。墨爾本勝利走勢的確唔錯，近5場取得4勝1和，其中3場贏2球或以上，睇得出狀態保持得幾好，加上中場米治柯士甸或可傷愈回歸，調動更添人手，前鋒貝利沙近期亦復勇頻有士哥，今場面對尾二嘅中岸水手，初段大可以放心搶攻。
水手殘陣兼失魂
至於中岸水手3連敗共失9球，而且全部都係上半場已經落後，仲衰到其中有2場開波5分鐘內就失守，球員精神集中力好有問題。水手防線上有積基斯法迪、史唐路斯及積基艾迪臣等傷兵缺陣，屬球隊持續不振嘅主因，恐怕短期內難以改善。再睇對賽往績，中岸水手近5次作客墨爾本勝利，錄得1和4負劣績，當中4次上半場落後，以球隊目前低迷狀態，更加抵擋唔住勝利一開波猛攻，捧勝利半場主勝啱數。