今晚英超早場，般尼茅夫主場硬撼「聖人」修咸頓。般茅今季踢出蔗渣價錢、燒鵝味道，尤其喺主場屢有佳作，連利物浦都要喺呢度擺低3分，近7仗聯賽主場贏5仗弗到震，遇上客場腳軟嘅「聖人」，食住個勢有力再下一城，仲有得受讓咁筍，必捧讓球主勝。（Now 632及LeSportsHK 應用程式周日晚9時30分直播）
4:3反勝利物浦最經典
般茅雖然大部分球員皆名不見經傳，但上季亦能護級成功，今季再借得或買入韋舒亞、佐敦伊比及尼敦阿基，呢班喺豪門淪為雞肋嘅球員，嚟到般茅全部翻生。好似近年傷多過踢嘅「玻璃腳」韋舒亞，喺人才濟濟嘅阿仙奴早已冇碇企，惜才嘅主帥雲格就將佢借去以地面進攻為主嘅般茅，果然一拍即合，呢位英格蘭國腳喺中場瞻前顧後，成為轉守為攻嘅重要樞紐，上月更當選球隊最佳球員，睇嚟般茅係失意軍人嘅翻生地。
查實般茅主場出擊特別sharp醒，近7仗聯賽主場錄得5勝1和僅1負，代表作係迎戰利物浦一度落後1比3之下，竟未有放棄奮力狂追，最終反勝4比3，另一失意兵尼敦阿基更喺完場前撞入致勝士哥，而李斯特城及熱刺造訪此地亦1輸1和，可見般茅係主場一條龍。相反，修咸頓唔單止喺歐霸分組賽踢到最後一輪飲恨出局，佢哋一離開主場即唔識踢波，近7仗作客錄得1勝2和4負，令人失望，中場重心奧里奧爾羅美奧今仗仲要坐波監，面對主場堅勁嘅般茅難言惡，邊有本錢讓波呢？一於捧讓球主勝。