11連勝強勢轟般茅
Boxing Day英超大戰連場，其中一場焦點大戰一定係「一哥」車路士主場出擊迎戰般尼茅夫。車仔暫時17戰得43分，只拋離第2位嘅利物浦6分，所以每場賽事都不容有失，更何況對着弱隊，全取3分係基本。相信領隊干地今晚一定會下令班球員搏到盡，預料會係大戰一場，中位數2.5球嘅入球大係明智之選。
（Now 622、LeSports HK應用程式周一晚11時直播）
英超聖誕快車，係全個球季最頻密嘅賽程！但車路士竟然喺呢段「魔鬼賽程」當中，失去今季狀態回勇、為球隊攻入13球嘅首席射手迪亞高哥斯達，同埋防守中場尼高路簡迪。皆因呢兩位主力同樣累積5面黃牌，今場齊齊坐波監，無緣Boxing Day披甲上陣。但相信都唔會影響車仔今場嘅表現，因為佢哋嘅對手只係積分榜第10位嘅般尼茅夫，入波話咁易喇！再加上，車仔自從改踢領隊干地以往慣用嘅343陣式之後，球隊表現即刻判若兩人，更拎到11連勝穩坐榜首。而且，干帥仲喺呢場比賽前，畀班球員放假叉足電，令到成班車仔兵個個都甘心為佢賣命呀！
般尼茅夫連仗失波多
另邊廂，般尼茅夫月初對利物浦一戰中，一度落後紅軍1比3嘅情況下，一口氣攻入3球，終以4比3反勝對手，盡展後上強勢同永不放棄嘅精神！不過喺93分鐘致命絕殺、為般尼茅夫射入奠勝球嘅中堅尼敦阿基，今場因借將合約條例而未能披甲上陣，對球隊後防線嚟講唔多唔少都有啲影響，何況佢哋近5場聯賽共失12球，對住攻力強勁嘅車仔，相信都幾難守得住呀！預計兩隊會攜手合演入球騷，入球大係信心之選。