防線穿窿以攻代守
西班牙賽事今晚重開，打頭陣係西班牙盃16強首回合，其中華倫西亞主場對切爾達較有睇頭。華倫主帥柏蘭迪利剛離隊，球隊軍心不穩，對住攻力唔錯嘅切爾達，後防未必頂得住，阿謙估計今仗入波唔會少，推介有1.8倍分頭嘅大盤。
（周三凌晨2時開賽）
華倫經歷季初一輪低潮後，自前意大利國家隊主帥柏蘭迪利上場後，球隊成績雖然未有明顯進步，但唔少球迷都認為華倫只要下半季成功增兵，就可以重回正軌。不過，華倫喺幾日前突然宣布柏蘭迪利辭職，後者其後接受訪問時批評華倫新加坡籍老闆林榮福言而無信，早前承諾在冬季轉會窗重開時會買入4位球員，但最終只得1人，令柏蘭迪利大為憤而劈炮。
華倫現時由看守教練禾路領軍，球隊正處於動盪不安氣氛中，而且防守力未見改善，由開季至今每仗都有失波，今仗主場面對攻力唔錯嘅切爾達，相信難保清白身。切爾達今季雖然要兼顧聯賽同歐霸兩條戰線，但仍能排喺中游位置，球隊前線伊亞高艾斯巴斯、約翰古達迪同基奧斯比羅斯狀態都唔錯，今仗有力攻破華倫大門，一於捧入球大。
拉彭再鬥馬體會追「半和」
另一場西盃16強首回合，拉斯彭馬斯主場對馬德里體育會，拉斯彭馬斯近期表現平穩，近5仗取得1勝3和1負，但中場主將奇雲保定有傷續抖，對球隊發揮必有影響。對手馬體會近3場都贏晒狀態復勇，但球隊仲有門將奧比歷同中場奧古士圖費南迪斯受傷未好番，早前同今仗對手拉斯彭馬斯交手開出半場和，今仗再開「半和」高唱入雲，再追。
（周三凌晨4時15分開賽）