阿King今次主力推介葡聯盃分組賽，B組嚟到最後一輪，傳統勁旅波圖出線形勢告急，今仗作客必須擊敗摩里倫斯，先至有望晉級，肯定要採取主攻。至於摩里倫斯唔贏，亦可能出局，跟本冇得死守，預料雙方好大機會互相駁火，首選入球大。
（周三凌晨5時15分開賽）
葡聯盃分組賽打單循環，只有小組首名可以出線，同分先計得失球，形勢非常緊湊。波圖2戰2和，今場起碼要擊敗有4分在手嘅摩里倫斯，先有望取得出線權。由於同組比蘭倫斯主場對已篤定出局嘅費倫斯，隨時會大勝，所以波圖更加要盡量贏多幾球，先至有機會獲小組首名，應會豁出去搶攻。
賓菲加炒得起甲組仔
摩里倫斯雖然和波就有5分，問題係一旦同組比蘭倫斯贏2球或以上，摩軍和波就會因為得失球唔及比軍，而失去出線權，因此今場唔可以死守求和。事實上，摩里倫斯上季主場鬥波圖，打和2比2，證明有反擊力，大盤值博。
D組方面，賓菲加已連奪近3屆葡聯盃冠軍，踢呢項賽事非常有心得，今仗對手只係甲組仔維薛拿，相信賓菲加可以大勝，讓兩球照取讓球主勝。同組甘馬雷斯狀態大勇，已連贏5場，今仗主場有力擊敗作客6連敗嘅費利拿。