近３次聯賽碰頭贏晒
由2016年踏入2017年第一日，英超爆發重磅大戰，由「二哥」利物浦主場硬撼曼城！「紅軍」喺高普帶領下踏入收成期，無論新兵舊將都表現可人，喺主場紅海打氣下信心倍增，撐紅軍響頭炮，推介2.18倍主勝！
（Now 621、LeSports HK應用程式周日凌晨1時30分直播）
紅軍火力冠絕英超
今場兩位領隊高普同哥迪奧拿，早喺德甲時代已經係老對手，高普帶領多蒙特8次對住哥帥領軍嘅拜仁，各贏4次平分秋色，但眾所周知拜仁人腳同資源都凌駕多蒙特，高普能夠做到呢個成績，足見功力不在哥帥之下。「紅軍」利物浦近期狀態大勇，聯賽3連勝轟8粒只失1球，包括上輪主場反勝史篤城4比1，暫以1分騎住曼城，落後榜首車路士6分，佢哋現時喺英超攻入45球，火力亦屬英超之冠。
對於爭標形勢，「紅軍」隊長佐敦軒達臣話只能做好自己，唔理得會其他對手咁多，「神軒」仲大讚早前缺陣1個月嘅前鋒史杜列治，相信呢位上場聯賽開齋嘅高質射手，喺進攻方面會有更多貢獻。利物浦今季喺晏菲路表現甚具霸氣，開季至今8仗主場賽事拎到6勝2和不敗佳績；加上紅軍近3次聯賽對曼城Win晒，甚有格食格味道，值得睇高一線！
阿古路復出未必夠弗
曼城上輪聯賽大炒侯城3球，但領隊哥迪奧拿就話要追過利物浦同車路士唔係易事，皆因呢兩隊有「每周一賽」嘅優勢，同上季神奇球隊李斯特城情況相似，而曼城就比車仔同利物浦踢多7場比賽，要兼顧歐聯同聯賽相當困難。曼城今仗雖有王牌射手阿古路坐完波監復出，但冇踢咁耐狀態成疑，利物浦借助主場威力有望全取3分，主勝係信心之選！