今晚英甲上演「前英超戲碼」，高雲地利主場對保頓，兩隊19年前曾經一齊喺英超比賽，估唔到今季卻於英甲碰頭。不過論表現，保頓遠勝一籌，近13場聯賽贏咗11場，好有機會重返英冠。反觀，高雲地利繼續沉淪，近8場聯賽1和7負，狀態高下立見，當頭起嘅保頓客勝可作過關重心。
（周一晚11時開賽）
保頓今季降落英甲，實力明顯超班，現時僅落後榜首錫菲聯1分，排第2位。保頓只要保持目前強勢，好有可能取得前2位直接升班資格，球隊依家士氣高昂，睇嚟仲有排威。反觀高雲地利今季24場聯賽僅4勝排尾二，只領先包尾奧咸2分，兼踢多1場，成績有幾差可想而知。高雲地利近年都喺英甲中下游浮沉，成為前列球隊搶分對象，恐怕今場亦唔會例外。
「一哥」錫菲聯強襲貝利
至於英甲一哥錫菲聯將作客貝利，錫菲聯4連勝，走勢凌厲，而且對手貝利屬於「魚腩」球隊，直取錫菲聯讓球客勝。另一場第3位嘅斯肯索普表現走下坡，近6仗僅1勝，主場都讓唔起近5次作客4勝1和嘅彼德堡，撐讓球客勝。