快車尾站曼聯作客易死火
英超假期繼續開快車，今晚尾場由韋斯咸主場對曼聯。總括番之前兩輪英超賽事，可以話係熱門天下，爆冷場次唔多，不過嚟到尾聲，強隊出事機會相信會愈來愈高，畢竟3日內應付兩場硬仗唔容易，紅魔鬼作客讓半一有暗湧，樂比捧下盤。
（Now 621及LeSports HK應用程式周二凌晨1時15分直播）
無疑曼聯近期開始上力，各項賽事加埋取得6連勝，不過贏波過程中亦唔係想像中咁順利，好似上場主場對米杜士堡就贏得相當驚險，完場前先憑安東尼馬迪爾及保羅普巴各入1粒反勝2比1，今場面對作客環境，加上踢法硬淨嘅韋斯咸，要贏兩粒先可以贏晒成個盤，樂比寧願博下盤。
紅魔拜利缺陣後防更危
曼聯另一隱憂係後防主力艾歷拜利已離隊向國家隊報到，準備即將舉行嘅非洲國家盃，艾歷拜利可以話係曼聯今季防線表現最佳球員，冇咗呢位定海神針，防線多甩漏在所難免。
蘭仙尼傷愈孭到飛
韋斯咸今季成績唔及上季，主要原因係傷兵太多，又搬咗新主場，但踏入季中情況已有好轉，隨住主力陸續復出，近5仗僅1敗，前線多咗安祖卡路爾喺度可以起到牽制作用，另外蘭仙尼亦於上場傷愈復出，領隊比歷排陣可多啲選擇。
韋斯咸上季有「強隊剋星」之稱，曼城、車路士、利物浦、阿仙奴、熱刺同今場對手曼聯都曾經輸過畀佢哋。雖然今季初段「剋星」威力銳減，但正如前文所述，韋斯咸已開始步入正軌，狀態全面提升，相信今場可回復巨人殺手嘅本色。