冇態美斯阿蘇又易嘜死
巴塞隆拿歇冬後聯賽第1擊即遇強敵，周一凌晨作客硬撼「黃色潛艇」維拉利爾，絕對係一大考驗。巴塞今季霸氣銳減，今輪聯賽開打前落後皇家馬德里3分兼多踢1仗（未計周六晚賽事），形勢相當險峻，喺尼馬等多位攻擊主力演出失準下，球隊往往需要更長時間撕破敵軍防線，半場和成為巴塞近期常態，今仗不妨再追。（Now 632周一凌晨3時45分直播）
巴塞隆拿嘅「MSN」組合令人聞風喪膽，弊在巴西球星尼馬今季表現下滑，踢咗半季只係得4個聯賽入球，加上中場主將恩尼斯達養傷復出後狀態大不如前，而新兵柏高艾卡沙同阿達杜倫等第2梯隊球員亦未有突出表現，令入球重任過分集中喺美斯同蘇亞雷斯兩人身上，對手更容易重點盯防。巴塞喺上周中西班牙盃16強首回合作客輸畀9人應戰嘅畢爾包，歇冬後狀態似乎麻麻，匆匆繼續作客之旅，未必咁易咬得入對手。
事實上，巴塞今季防線甩漏頗多，加上多位中前場球員狀態未達巔峰，令球隊欠缺昔日無堅不摧嘅霸氣，面對對手屯重兵後場就會陷入苦戰。巴塞近7仗聯賽中，就有6場同對手喺半場打成平手，包括對住皇馬、皇家蘇斯達同西維爾，全部皆開出半場和，今仗作客維拉利爾，隨時又係另一場硬仗。
維拉利爾防線西甲最堅
維拉利爾今季表現突出，有力爭取來屆歐聯參賽資格，歇冬前16場聯賽只係輸過3場，當中最大功勞的，肯定係只失11球嘅全西甲最堅固防線。「黃色潛艇」今仗迎戰巴塞，仲有後防主力域陀雷斯以及中場般奴蘇利安奴傷愈復出，一定會用最擅長嘅穩守突擊戰術「招呼」巴塞，上半場先求穩住陣腳，再伺機發動突擊，預料換邊前戰情膠着居多，一於推介半場和。