今晚仍然有意大利盃16強賽事，ＡＣ米蘭主場對拖連奴，ＡＣ上屆意盃打入決賽，僅於加時不敵祖雲達斯，今屆捲土重來更加渴望捧盃。事實上，ＡＣ今季由少帥蒙迪拿執教後，重用年輕球員後球隊表現大躍進，加上近6次主場鬥拖連奴，獲得5勝1和優勢，主Ｗ值博。
（周五凌晨4時開賽）
拖連奴遇強即屈
ＡＣ米蘭過去3季意甲排名最高僅第7位，已經連續3年無緣出戰歐洲賽，為重拾昔日光輝，今季球會致力年輕化，除起用「飛機仔」蒙迪拿執教外，一班「90後」包括門將基安盧基當拿隆馬、後防阿利斯奧羅馬洛尼、中場蘇索及文路爾盧卡迪利等更成功接班，帶領ＡＣ復興。
ＡＣ復興代表作必數首循環聯賽主場1比0擊敗聯賽5連霸嘅祖雲達斯，早前喺意超盃，再憑互射12碼擊敗祖記，贏得球會自2011年以來首項正式冠軍，士氣進一步提升，當然希望今季可以捧埋意盃。
拖連奴主帥米赫洛域上季被ＡＣ炒魷，今季聯賽首循環倒戈作客ＡＣ，以2比3落敗，可見佢教波功力的確唔及蒙迪拿。事實上，拖連奴往往「遇強即屈」，今季聯賽面對其餘幾支名牌球隊，例如國際米蘭、祖雲達斯、拿玻里，都告落敗，今仗凶多吉少。