近3季聖誕新年檔不敗
英超聖誕新年快車今晚嚟到最後1站，上演壓軸倫敦打吡，由熱刺主場硬撼「1哥」車路士。雖然車仔聯賽連贏13場，只要今仗再贏就會打破英超單季最長連勝紀錄，但熱刺堪稱聖誕新年快車之王，連埋今季在內，近3季總共11仗未輸過，證明踢快車賽期特別有心得，加上近年主場對車仔不落下風，有力煞停「黃金戰車」連勝走勢，平手盤可謂坐和望贏。
（Now 621及LeSports HK應用程式周四凌晨4時直播）
阿朗素有傷車仔焗變陣
車仔改踢「343」陣式後，喺聯賽連贏13場，並且追平14年前阿仙奴於英超單季最長連勝紀錄，若果今仗再贏熱刺就可破紀錄，兼且再追平阿仙奴跨季14場連勝佳績。斯維唔係懷疑車仔嘅能力，今仗仲有前鋒柏度洛迪古斯刑滿復出，不過長路總有盡頭時，唔單止左翼衞馬高斯阿朗素因傷上陣成疑，牽一髮動全身，而且撞正聖誕新年快車之王熱刺，車仔要贏落去真係唔易。
普捷天奴自2014年接手熱刺後，每逢於聖誕新年快車賽期特別醒神，未計今仗，近3季總共踢咗11仗「快車賽」，錄得9勝2和不敗佳績，單計今季3仗更贏晒。如果大家記性好嘅話，2015年1月車仔作客熱刺，當時車仔又係季初順到冇朋友排緊「冧巴溫」，點知嗰場造訪白鹿徑球場輸3比5，令人跌晒眼鏡，雖然嗰季車仔最終都封王，但同上半季玩到穿花蝴蝶嘅進攻足球相比，下半季變得極度保守，正係由輸畀熱刺嗰場開始。
哈利仔＋阿里＝入波保證
翻查紀錄，原來車仔近6次聯賽作客熱刺，只獲1勝4和1負，毫無甜頭可言，就算依家挾13連勝強勢而臨，都唔係一定贏梗。熱刺今季係聯賽保持不敗最耐球隊，但正正喺11月尾遭車仔反勝2比1而打破不敗金身，而且上季季尾又係畀車仔逼和2比2，導致失去爭標機會，加上係同市死敵，新仇舊恨加加埋埋，呢場打吡戰熱刺一定搏甩髀，況且兩大守將維頓漢及基爾獲加坐完波監可復任正選，前線孖寶哈利卡尼及迪利阿里近3仗又合轟8球，腳風堅順，絕對有力打斷車仔連勝氣勢，平手盤真係有買趁早。