屈機組合又嚟過
英超最屈機組合──「米奇甸恩×熱刺」又嚟啦！英足盃第3圈賽事熱刺主場迎戰英冠阿士東維拉。熱刺牌面贏晒，但英格蘭足總似乎覺得「唔夠穩陣」，竟指派近期最具爭議、公認「熱刺躉」嘅米奇甸恩執法今仗，呢位球證今季3次吹熱刺嘅比賽，對手最後都唔夠11人而輸波，熱刺1.75倍讓球主勝咪走寶！（LeSports HK應用程式周一凌晨零時直播）
熱刺啱啱喺英超2比0擊敗車路士，終止對方13連勝走勢，近5仗全勝勢如破竹，雖然今仗普捷天奴應會收起部分主力，門將洛里斯、前鋒哈利卡尼同迪利阿里等球星獲休息機會，不過佢哋兵力強橫，仲有孫興民及雲遜贊臣等高質兵替補，最重要嘅係「第12人」──球證米奇甸恩將會執法今仗！
近6仗執法熱刺贏晒
足總今次搵米奇甸恩吹呢場波，即時引起維拉球迷瘋狂炮轟，事關米奇甸恩一直被指係「熱刺躉」，新鮮滾熱辣就係10日前嘅英超，熱刺作客4比1大炒修咸頓，當時米奇甸恩爭議性趕修咸頓嘅列特文出場兼畀熱刺12碼，直接主宰咗勝負，更蹺嘅係，米奇甸恩今季吹過熱刺3仗，熱刺3隊對手都有人食紅牌，而熱刺當中仲拎到2個12碼添！
睇番數據，米奇甸恩近6次吹熱刺嘅比賽，熱刺全勝之餘，當中獲得3個12碼同埋對手食咗3張紅牌，咪以為傳媒關注會令佢收斂，事關米奇甸恩曾經2次被影到疑似慶祝熱刺入波（其中1次就係對維拉），上次對修咸頓又喺比賽中同熱刺嘅迪比利擊掌，完全唔需要掩飾，熱刺個勢咁勁仲要「打多個」，想唔大炒都難啦！
維拉領隊布魯士賽前賣晒口乖，話米奇甸恩係個好球證，又話依家球證執法好困難，不過維拉今季降落英冠後繼續令人失望，依家只排喺第12位，想即刻重返英超機會渺茫。維拉啱啱向曼聯借得年輕門將森莊士東，預計今仗會首度披甲，但維拉今仗撞正「甸恩×熱刺」呢個無敵組合，慘敗似乎無可避免。