法國聯賽盃8強賽事，巴黎聖日耳門（PSG）主場迎戰梅斯。PSG已經連奪3屆稱霸法聯盃，爭盃決心毋庸置疑，梅斯要為護級而搏命，仲邊有閒情兼顧盃賽？讓球主客和「-2」照撐。
（TVB 303周四凌晨4時05分直播）
PSG連續2季榮膺國內3冠王，當中法聯盃今屆更係挑戰4連霸霸業，雖然去年夏天放走教練白蘭斯同主力伊巴謙莫域後，整體表現比以往明顯有所不及，不過佢哋今個月簽入德國猛將達斯拿，上仗足總盃即刻有波入助PSG大派7蛋，證明呢支勁旅喺法國仍然地位超然，為保住3冠王霸主地位，衞冕法聯盃絕對是眼前首要目標。
近5交手梅斯輸晒
梅斯今季以法乙季軍身份重返法甲，現排聯賽榜第18位，成績為3支升班球隊中最差，為保留實力下半季踢護級戰，踢盃賽嘅決心肯定唔及主隊。梅斯近5次作客PSG全敗之餘，每仗至少失3球，而且當中有4次淨輸3球或以上，包括今季首循環輸0比3，加上梅斯歇冬前6仗聯賽作客輸5仗，5次輸波皆0入球，今次作客PSG很大機會再捧蛋而回，讓球主勝啱數。