利物浦唔齊腳啞火
今晚上演另一場英格蘭聯賽盃4強首回合，由「聖人」修咸頓主場硬撼上屆亞軍利物浦。紅軍有快翼沙迪奧文尼出戰非國盃而暫時離隊，菲臘比古天奴近日已復操，但就算上陣都未夠弗，火力大減，撞正於聯賽盃擅施「守」術嘅修咸頓，唔慌多波入喇，一於捧中位數2.5球嘅1.72倍入球細。
（周四凌晨3時45分開賽、馬會網上文字直播）
古天奴復出未必夠弗
利物浦今季表現突出，同前線「3叉戟」菲臘比古天奴、羅拔圖法明奴及沙迪奧文尼火力全開不無關係，單計聯賽紅軍已轟入48粒，喺英超冠絕群雄，3叉戟就包辦當中20球，不過古天奴因傷缺陣咗成個月有多，主帥高普賽前話會畀佢今晚落場踢幾分鐘，為下仗聯賽「雙紅會」作客曼聯做熱身，但相信出得都未必夠弗。至於沙迪奧文尼依家要為塞內加爾出戰非洲國家盃而暫時離隊，另一箭頭羅拔圖法明奴近期亦表現下滑，紅軍火力大減。利物浦日前先喺足總盃主場對乙組仔普利茅夫，初頭派大批新仔上陣，點知留力留出禍，攻極都唔入，其後換入羅拔圖法明奴、史杜列治及拉爾拉拿等主力，但為時已晚最終打和0比0，搞到要擇日重賽，睇得出紅軍攻力出咗問題。
聖人聯賽盃3戰不失
另一邊廂，修咸頓續有箭頭查理柯士甸因傷倦勤，今仗主場遇強必定先做好防守，「聖人」今屆聯賽盃非常守得，之前3仗贏晒兼保持冇失波，全部總入球都少過3球，包括8強作客贏另一勁旅阿仙奴2比0，證明防線頂得兩嘴，近期演出略見「啞火」嘅利物浦，要攻破「聖人鐵閘」絕非易事，就算贏都係小勝居多，不如改捧中位數2.5球嘅1.72倍入球細更划算。