今晚賽事雖然唔多，但阿King一樣搵到好嘢，法國足總盃會上演3場64強賽事，其中喺法甲排第2嘅摩納哥主場迎戰法乙球隊阿些斯奧。摩納哥主場表現一向有保證，球隊實力遠勝阿些斯奧，就算有球員要出戰非國盃缺陣，都有望大勝過關，讓球主客和摩納哥讓兩球都冇有怕，阿King照捧讓球主勝。
（TVB 303周六凌晨4時直播）
摩納哥歇冬前表現理想，近4仗錄得3勝1負，只係輸過畀排第4嘅里昂，佢哋嘅前鋒今季表現唔錯，哥倫比亞射手法卡奧鹹魚翻生，加上剛當選2016法國體育明星嘅前鋒謝明，以及連續兩場都有波入嘅中場泰莫爾巴卡約高，今仗絕對有力攻破對手大門。摩納哥雖有拿比達亞同阿達馬查奧爾因要踢非國盃而避戰，後衞基歷克同班捷文文迪停賽，但球隊兵源充裕，相信影響唔會太大。
阿些斯奧正選門將唔踢
阿些斯奧喺法乙排第15，實力明顯同摩納哥有距離，而且佢哋歇冬前喺聯賽已經連輸兩場，狀態只係一般。阿些斯奧正選門將祖利斯哥達因要踢非國盃，今場唔會披甲，缺少呢位主力，要作客近9仗主場贏8仗嘅摩納哥，相信都係凶多吉少。
至於其餘兩場賽事，法乙拉瓦勒連續兩屆法足盃都喺64強出局，包括上屆輸畀低組別球隊格蘭維爾，似乎唔係好志在呢項盃賽，今仗作客丙組球隊阿夫朗甚難言惡，捧主隊贏波。另一法乙球隊GFCO阿些斯奧有中場穆林巴離隊出戰非國盃，實力大打折扣，加上作客成績唔突出，難贏丙組球隊利斯靴比亞斯，捧讓球主勝。