兩球在手又有地利
西班牙盃上演16強次回合，馬德里體育會主場對拉斯彭馬斯，馬體會首回合作客贏2比0，今仗可以歎慢板，睇定來踢，最緊要避免受傷。拉斯彭馬斯近8場作客未贏過，睇怕亦惡唔出樣。同埋雙方近5次交手，有4次總入球係2球或以下，最好揀入球細。
（周三凌晨4時15分開賽）
馬體會首回合作客輕鬆贏兩粒，已反映兩隊實力存在好大距離，但以教練施蒙尼穩健作風，今仗冇必要盡數對手，甚至可能收起部分主力休息，亦唔出奇。事實上，馬體會上月聯賽主場鬥拉斯彭馬斯，都只係小勝1比0，今仗唔慌多入球。
拉斯彭馬斯近8場作客只有3和5負，想收復失地相當困難，加上下仗西甲將硬撼巴塞隆拿，就算「放棄」今場西班牙盃，亦唔出奇，估計入波機會甚低。
甘馬雷斯大鬥賓菲加
另外，葡聯盃D組最後一輪生死戰，甘馬雷斯主場對賓菲加，甘馬雷斯必須贏波，先至可以出線，應該會豁出去一搏。至於賓菲加和波都可以出線，但佢哋身為葡聯盃3連冠，又點會屈就求和呢，隨時鬥攻，捧入球大。另一場葡聯盃費利拿主場對維薛拿，兩隊都已篤定出局，但費利拿始終係葡超球隊，可以睇高一線。