哥迪奧拿搶盃減壓！
英格蘭足總盃第3圈今晚展開，英超及英冠球隊加入戰圈，頭炮即上演英超球隊對決，韋斯咸喺主場硬撼曼城！人丁單薄嘅「錘仔幫」韋斯咸經過聖誕新年快車，已經踢到殘，今場仲缺少兩位離隊備戰非國盃嘅主力阿休同高耶迪，令球隊雪上加霜。反觀曼城勝在兵多將廣，就算輪換陣容都一樣夠殺，加上主帥哥迪奧拿急需改善成績減壓，爭勝決心有保證，曼城讓半一捧上盤。
（周六凌晨3時55分開賽）
錘仔孖寶踢非國盃缺陣
英超聖誕新年快車賽程頻密，即使傳統豪門都嗌晒救命，韋斯咸呢類中小型班就更加吃不消。「錘仔幫」除咗快車首仗贏弱隊史雲斯之外，近兩仗鬥李斯特城、曼聯，都輸波兼捧蛋。特別係上仗對曼聯，開波15分鐘就有中場菲侯利被逐，大部分時間踢少1人，體力消耗更大，今場未必回到氣。雖然菲侯利打甩咗張紅牌，今場可以落場搏殺，弊在阿休及高耶迪已經離隊為所屬國家隊備戰月中嘅非國盃，情況比上仗鬥紅魔鬼更惡劣，睇怕領隊比歷唔敢奢望爆冷。
藍月亮人腳體力都贏晒
曼城中場費蘭甸奴上仗攞紅牌，上訴失敗要停賽4場，但曼城勝在兵源充足，特別係耶耶托尼已退出科特迪瓦國家隊，加上尼日利亞冇份踢非國盃決賽周，伊恩拿祖毋須為國服役，淨係呢點已經遠比韋斯咸佔優。而且兩位主將阿古路、大衞施華上仗都係後備入替，領隊哥迪奧拿明顯留有一手，保存體力應付今場比賽。事實上，曼城喺英超已跌至第4位，如果連英足盃都失利，哥迪奧拿肯定面臨更大壓力，今場正好趁韋斯咸人腳唔齊，速戰速決贏波晉級，以免夜長夢多。