寸王肉緊首回合要盡數
今晚英格蘭聯賽盃爆發4強首回合，由連贏8場嘅曼聯主場迎戰「老虎」侯城。紅魔主帥莫連奴一向重視聯賽盃，賽前事先張揚話伊巴謙莫域、保羅普巴等主力會復任正選，擺明想藉地利盡早鎖定決賽嗰張入場券，相反「老虎」新帥馬高施華初到貴境，道行與同胞「寸王」差幾條街，加上心繫護級隨時勒住，紅魔就算讓2球照捧讓球主勝。
（周三凌晨4時開賽）
大勇伊巴抖夠搏老命
曼聯日前派出朗尼等多名副選上陣，喺足總盃大勝雷丁4粒晉級，贏得不費吹灰之力，明顯係為今仗留力。賽前紅魔主帥莫連奴講到明，話上仗冇出嘅伊巴謙莫域、保羅普巴、安達靴里拉同路爾斯華倫西亞等主力，今仗一定正選上陣。始終依家距離決賽只有一步之遙，為咗有冠軍落袋一定搏盡，而且莫連奴一向重視聯賽盃，睇番佢之前2次執教車路士，咁啱得咁蹺，首項冠軍都係聯賽盃，佢梗係想延續呢個首冠傳統，難得抽到好籤，4強只係對弱旅侯城，絕對係殺入決賽大好良機，戰意必堅。
事實上，「寸王」近期一改以往保守風格加強進攻，例如將保羅普巴推前一格當進攻中場，直接令安東尼馬迪爾、拉舒福特、桑馬達、米希達利恩等輪流發威，令攻勢更加順暢，聯賽連盃賽已經連贏8場弗到震，箭頭伊巴謙莫域之前10仗披甲賽事轟入10球，上仗冇出畀呢位老將抖到夠，今仗復出必定盡情數胡。
侯城殘陣內部立立亂
另一邊廂，侯城內部則立立亂，上周中怒炒10月才獲扶正嘅主帥費蘭，搵咗前奧林比亞高斯教頭馬高施華匆匆接手，雖然上仗足總盃首度領軍即贏史雲斯，但呢位39歲少帥初到貴境，毫無英超執教經驗，點同葡萄牙同胞兼「老江湖」莫連奴相比呀。況且侯城喺聯賽排緊包尾，依家梗係護級大過天，聯賽盃可擺埋一邊，而「老虎」今季喺英超失掉44球，係失球第2多嘅球隊，睇埋侯城近4次造訪曼聯全敗，今仗仲有艾穆罕默迪同馬保卡尼要踢非國盃而缺陣，真係未踢已經腳仔軟，紅魔為免夜長夢多，必趁今仗主場之利大勝對手，提早鎖定決賽入場券，就算讓球主客和要讓2球，斯維仍力撐讓球主勝。