鳳凰作客腳軟遇剋星
今日澳職上演獨腳戲，珀斯光輝主場對威靈頓鳳凰，來自新西蘭的鳳凰係澳職出名嘅「作客蟲」，今季開咧至今作客波未贏過，加上今仗要長途跋涉去到西澳洲比賽，面對以逸待勞加上往績「格食格」嘅光輝，相信都係冇運行。光輝主場小讓平半，阿謙推介上盤。
（有線64及203台周四晚6時直播）
鳳凰連續3場都和波表現平平，而且佢哋作客表現亦麻麻，開咧後5場作客賽事只得1和4負，球隊明顯唔擅長踢客場賽事。鳳凰今仗雖然有新加盟嘅前鋒史美斯有望上陣，而中場麥堅治嘅膝傷亦好得七七八八有望復出，但另一中場雲斯利亞要坐波監，對球隊實力始終有影響，加上要舟車勞頓由新西蘭去到西澳洲比賽，今仗都係難以看好。
迪亞高卡斯度專收鳳凰
光輝近期表現雖然一般，但球隊前仗造訪勁旅墨爾本城，門將列迪神奇地救出兩個12碼，最終以3比3逼和對手，令球隊信心同士氣都有顯著回升。光輝今仗雖有守衞祖碧治同中場班頓威爾遜停賽，另一中場奧斯布路腳傷上陣成疑，但近3次聯賽同鳳凰交手全部贏晒，包括季初以2比0淨勝對手，而中場迪亞高卡斯度喺上述3場勝仗入面，有兩場都有波入，「格食格」下今仗有望贏波反彈，光輝上盤值得支持。