雖然今晚賽事唔多，但阿King依然搵到筍嘢，就係德乙獨腳戲，由漢諾威主場對「德國紅魔」凱沙羅頓。由於德乙啱啱先歇完冬，大家狀態仍有待提升，而「德國紅魔」最叻玩拉布，預計初段會處於膠着，不妨捧半場和。（周二凌晨3時15分開賽）
齋睇排名，「2哥」漢諾威遠高於凱沙羅頓，不過要留意德乙啱啱先歇完冬，球員未上力亦好正常，所以唔好睇得漢諾威太高，而近年沉淪乙組嘅凱沙羅頓，早已不復當年勇，依然排緊中下游，教頭哥古特又突然辭職，新帥羅拔美亞要穩定軍心，今仗必定穩打穩紮。睇番「德國紅魔」之前7仗聯賽，只得2勝4和1負，不過全部都開半場和，證明呢班波擅長玩拉布，況且佢哋都需要搶分護級，面對勁旅漢諾威會小心為上，半場和值得追多鋪。
睇好賓菲加競賽會
葡超方面，賓菲加啱啱於葡聯盃爆冷畀摩里倫斯踢出局，衞冕失敗谷埋成肚氣，今晚作客塞圖巴爾勢必盡情發洩，讓球客勝有計。最後係聽朝阿錦標獨立隊對競賽會，主隊有李安度費南迪斯、山齊士米路及尼高拉斯費高等多名主力因傷缺陣，競賽會可趁機打落水狗。