英西雙雄年廿八分途出擊，展開盃賽反擊戰！利物浦喺英超連番失利後，英聯盃4強次回合返到晏菲路鬥修咸頓，要收復落後0比1失地，非勝不可。皇家馬德里出戰西班牙8強次回合，「銀河艦隊」首回合主場以1比2不敵切爾達，今仗作客更惡踢。兩大豪門能否打場逆轉戰洗邋遢，一吐烏氣？
修咸頓硬淨細抗紅軍
今晚英聯盃4強次回合，利物浦主場硬撼「聖人」修咸頓！首回合落後1粒嘅利物浦，今仗許勝不許和，不過「聖人」修咸頓今屆英聯盃表現堅sharp醒，連鬥4支英超球隊贏晒兼保持冇失球，硬淨到暈，紅軍要攻破呢道銅牆鐵壁並非易事，捧中位數2.5球入球細更划算。
（周四凌晨4時開賽、馬會網上文字直播）
同足總盃唔同，紅軍對待聯賽盃嘅態度非常認真，睇番佢哋喺4強首回合派盡主力，可惜作客仍以0比1輸畀修咸頓，今仗贏波先有價講。不過紅軍要爭取入波嘅同時，亦要守好條後防線，始終「紅軍」今季門將個位無論用米洛列特或卡利奧斯，都未能予人信心，而且中堅卡拉雲表現亦時好時壞，從上仗對弱旅史雲斯都要輸2比3，被打破今季各項賽事主場不敗身，可見佢哋谷得太上，條紙紮防線便會暴露更多空位，今仗一旦畀修咸頓突襲成功，會令紅軍形勢更加被動，況且只係落後1粒唔算難追，主帥高普深明淘汰賽穩字行先嘅重要性，預計今仗唔會輕舉妄動。
聖人英聯盃4戰未失波
「聖人」修咸頓今屆喺聯賽盃對手全部係英超球隊，除咗主場淘汰水晶宮及新特蘭之外，8強作客亦以2比0擊敗阿仙奴，連同4強首回合以1球贏紅軍，4仗贏晒兼保持清白之身，全部總入球皆在2球或以下，可見佢哋防線固若金湯。修咸頓依家揸住1球優勢，作客晏菲路球場必先求穩陣，何況「聖人」近5次作客晏菲路亦有4次總入球少過3球，相信今仗大家都唔敢亂嚟，入球唔慌多，細盤乃不二之選。
皇馬作客恰慣切爾達
西班牙盃8強次回合，皇家馬德里作客再鬥切爾達。皇馬首回合主場輸1比2，想晉級非勝不可，雖然有唔少傷兵，但上仗聯賽贏波止跌，對球隊有唔少正面作用。皇馬過去10次作客切爾達贏過8場成績唔錯，加上今仗會強陣出擊，相信「銀河艦隊」可以贏番場，阿謙推介客勝。
（周四凌晨4時15分開賽）
皇馬首回合主場以1比2不敵切爾達，其後聯賽更被西維爾以2比1擊敗，連續40場不敗斷纜後再受挫折，令唔少球迷擔心佢哋會一路沉淪落去，幸好皇馬成功振作，上仗聯賽以2比1擊敗馬拉加及時止血。如今「銀河艦隊」喺西班牙盃需要收復失地，雖然右後衞馬些路同中場莫迪歷成為最新「十字軍」，前者要抖1個月而後者則休戰10天，但球隊賽前收到加里夫巴利有望3月復出呢個好消息，主帥施丹今仗勢必派遣強陣喪攻，以求絕地反勝。
切爾達防線靠唔住
切爾達今仗只需保持不敗，便可繼上屆後再次進身西班牙盃4強，佢哋雖然喺今季聯賽主場曾以4比3擊敗巴塞隆拿，但又試過淨吞西維爾3蛋，球隊今季聯賽19仗失咗33球，防線並不可靠，何況佢哋近年喺主場迎戰皇馬根本冇優勢可言，聯賽連盃賽近10次交手輸咗8場，以切爾達而家嘅防線，就算有主場之利都未必擋得住皇馬嘅強攻，1.52倍客勝非常值博。