阿仙奴缺2大福將
今晚英超頭場上演最激倫敦打吡，由榜首車路士主場迎戰「三哥」阿仙奴。周中快車多支列強失分，Big 6得曼城贏到波，變相益咗帶頭嘅車路士，最慘就係阿仙奴，輸波之餘仲要損兵折將，失去艾朗藍斯呢位主力，兵工廠中場隨時失控，車路士讓平半有1.72倍分頭，樂比撐上盤。
（Now 621及LeSports HK應用程式周六晚8時30分直播）
阿仙奴周中爆冷1比2不敵屈福特，好大程度同艾朗藍斯上半場受傷退下火線有關，因為呢位威爾斯國腳踢法全面，進攻防守組織樣樣掂，之前上陣嘅10場聯賽、3場歐聯同埋1場足總盃，阿仙奴取得10勝4和不敗佳績，可見佢喺球隊嘅重要性。
藍戰士中場線打晒骰
除咗艾朗藍斯缺陣外，阿仙奴仲有艾利尼出戰非洲國家盃及格列沙加停賽，加埋傷咗一段時間嘅辛迪卡索拉齊齊缺陣，講起卡索拉佢又係阿仙奴福將，今季10次正選上陣從未輸過，取得8勝2和佳績，今仗「兵工廠」冇兩位「福將」，都咪話唔大鑊，領隊雲格排陣都幾頭痕，預計會將阿歷士張伯倫移入中路拍住高基連，但呢個組合對住中場強大嘅車路士真係凶多吉少，事關車仔Run到順嘅「３４３」陣式，條中場線可謂最煞食，相信尼曼查馬迪同尼高路簡迪呢個一高一矮組合，可以壓倒性統治中場。
其實車路士依家可以喺聯賽有9分優勢都要多謝阿仙奴，事關佢哋首循環慘吞阿仙奴3蛋後，干地痛定思痛改踢「３４３」陣式，點知取得空前成功，可惜雲格仲停緊賽，今場要坐喺觀眾席冇得落場，干地想講聲多謝都唔得，惟有入多幾球送畀佢，等阿仙奴專心歐聯好過啦！