大年初二晚飯時間有巴塞隆拿登場，「地上最強」近期狀態回勇，連續2仗聯賽都大勝，今仗作客下游球隊貝迪斯，贏波似乎毫無難度，喺巴西前鋒尼馬都腳風轉順後，「MSN」終於回復霸氣，可望上半場已火力全開，今仗捧半場大（1.5球）最好！（Now 632周日晚7時直播）
巴塞早前陷入小低潮，尼馬陷入球荒之餘後防亦見不穩，教練安歷基被迫調整戰術加強防守，不過隨住美斯、蘇亞雷斯同尼馬嘅「MSN」重返正軌，巴塞亦展現強大進攻火力，近2仗聯賽分別以5比0炒拉斯彭馬斯同4比0大破伊巴，而且2仗都喺上半場已經領先。
貝迪斯主場唔龜縮
尼馬上仗對伊巴攻入1球，打破長達3個月嘅「陣地戰」入球荒，火力回復正常後，巴塞可以放心踢番最擅長嘅壓迫性進攻，務求盡早打開紀錄。事實上，佢哋近7次同貝迪斯交鋒取得全勝，其中5仗半場總入球達到2球或以上，今仗值得再追。貝迪斯主場出擊有一定戰鬥力，近5仗主場3勝2和未逢1敗，班人喺主場唔會龜縮，會盡可能偷襲巴塞防線，上半場出現多入波機會頗高。
西班牙盃同時亦抽咗籤，巴塞同馬德里體育會將會喺4強交鋒，另一個決賽席位就由切爾達同艾拉維斯爭奪。