西甲「雙巴」交鋒，伊巴主場鬥巴塞隆拿，睇牌面巴塞當然佔盡上風，但「地上最強」作客並唔強，上周中西班牙盃作客皇家蘇斯達，都係小勝1比0，匆匆再戰又要作客都好惡踢，加上伊巴防守穩陣，預料會「泊大巴」死守，推介中位數3.5球嘅入球細。（Now 632周一凌晨3時45分直播）
包括盃賽在內，巴塞近6場正式賽事作客，只贏兩場，近8仗作客總入球更加都係3球或以下，上仗西班牙盃如非博到12碼，可能都贏唔到，攻力令人失望。加上搏完1場惡鬥，立即又作客，球員舟車勞頓，體力消耗甚大，想大勝都有心無力。
巴塞未回氣唔會冒進
事實上，西甲現時已進入爭標關鍵時刻，教練安歷基應會採取更穩陣嘅方式取分，唔亂強攻，尤其馬斯真蘭奴仲要停賽，拉芬拿艾簡達拿又傷咗，一旦被對手偷襲得手，只會得不償失又失分，估計今場就算贏，都係小勝居多。
伊巴今季表現令人驚喜，可以位處中游，皆因防守佳，18場聯賽失24球，只係比第2位西維爾失多2球。聯賽主場鬥強隊，演出更加唔失禮，包括曾經打和西維爾1比1，僅0比2不敵馬體會，甚至作客打和過皇馬1比1，絕對係強隊眼中嘅豬頭骨，巴塞想大炒佢哋，非常困難，預料今場攻防戰，入波唔會多，客W得1.18倍冇肉食，中位數3.5球嘅入球細有1.65倍，勝在夠穩陣。