今晚得9場波但阿King一樣索到好嘢，重心係聽朝早嘅南美自由盃外圍賽第2圈首回合，烏拉圭球隊蒙特維多流浪主場對玻利維亞球隊強者。「蒙流」剛踢完自由盃首圈賽事，球隊火力強勁，面對作客表現麻麻嘅強者，相信有力先拔頭籌，阿King推介主勝。
（周五早上6時15分開賽、馬會網上文字直播）
南美自由盃現階段係外圍賽第2圈賽事，要踢埋外圍賽第3圈先會到分組賽。蒙特維多流浪今季由第1圈踢去，首先以兩回合計7比5淘汰玻利維亞球隊蘇克雷大學嚟到第2圈，球隊聽朝早將會遇上另一支玻利維亞球隊強者。蒙特維多流浪喺外圍賽首圈盡現強大火力，主力射手沙治奧白蘭高同埋基斯甸柏拉斯奧斯喺嗰兩場賽事分別入咗3球同2球，可見佢兩個狀態唔錯，加上球隊近7仗主場取得6勝1和嘅佳績，今仗有望先拔頭籌。
強者作客唔多掂
至於作客嘅強者係直入自由盃外圍賽第2圈賽事，佢哋剛剛喺聯賽揭幕戰作客以0比3輸畀瓜比拉，表現令人失望。事實上，強者喺嗰場賽事都算係強陣出擊，主力迪亞高比查連奴同柏保路艾斯高巴悉數在陣，對士氣有好大影響。而且強者作客向來表現一般，球隊喺對上7次自由盃嘅作客賽事只得1勝1和5負，可見佢哋完全唔識踢作客波，今仗遠征烏拉圭相信都係凶多吉少。
串迪華利獨立隊入球細
另外兩場自由盃外圍賽第2圈賽事，厄瓜多爾球隊迪華利獨立隊近5仗主場錄得2勝3和嘅成績，而巴拉圭球隊奧林比亞近3場只係失咗1球防守力甚強，今仗應該唔會多波入，捧中位數2.5球嘅細盤。
（周五早上8時開賽、馬會網上文字直播）
而另一支巴拉圭球隊卡比亞塔連續3場賽事未輸過仲冇失波狀態唔錯，至於對手秘魯體育大學近10仗作客贏得1場，今仗造訪卡比亞塔應該都係冇運行，一於捧主勝。
（周五早上8時15分開賽）