今日大年初一，斯維先祝各位讀者萬事勝意，贏到開巷，今晚英格蘭足總盃第4圈連場好波陪你過年，其中壓軸尾場爆發英超內訌，由「聖人」修咸頓主場硬撼阿仙奴。修咸頓喺今屆國內盃賽特別醒神，啱啱更殺入聯賽盃決賽唔講得笑，加上近年主場出擊又食住「兵工廠」，仲有得受讓咁筍，斯維力撐讓球主勝開個靚頭。（LeSports HK應用程式周日凌晨1時30分直播）
阿仙奴中場缺兩主力
阿仙奴近6仗錄得5勝1和睇落唔錯，不過再仔細研究，當中有3仗去到末段先入波，煲魚生粥僅僅熟，包括上仗對般尼，去到補時最後一刻至靠阿歷斯山齊士攻入具爭議性嘅12碼贏2比1，而上圈足總盃作客英冠仔普雷斯頓，又係完場前1分鐘憑基奧特絕殺先反勝2比1，贏得冇乜說服力。而且上仗領紅嘅中場格列沙加，係佢今季第2次做紅牌阿姑，按例要坐4場波監，今仗唔使預佢，而艾利尼仲踢緊非國盃未歸隊，中場較為硬淨嘅只剩番高基連，影響唔細。
修咸頓英聯盃贏過兩粒
修咸頓雖然喺聯賽只排第11位，遠低於「2哥」阿仙奴，但近5次對碰錄得3勝1和僅1負佳績，包括喺今屆英聯盃8強作客以2比0淘汰「兵工廠」，睇番「聖人」今屆喺國內盃賽特別sharp醒，佢哋喺聯賽盃連贏3隊英超球隊闖入4強，並剛於4強兩回合對利物浦贏晒，合共5場波未失1球進身決賽，絕對唔嘢小。況且修咸頓自2012/13年度球季重返英超後，4次主場對阿仙奴錄得2勝2和未輸過佳績，咁啱得咁蹺，當中有3次係喺1月發生，注定佢哋有運行，仲有得受讓必捧讓球主勝。