谷住度氣搵馬體會開年
西班牙盃4強首回合上演重量級大戰，由馬德里體育會主場迎戰巴塞隆拿。馬體會今季表現明顯不及過去數屆，加上陣中有唔少傷兵，面對剛喺聯賽因球證誤判而失分，谷埋一肚火嘅巴塞，就算有主場之利都未必可以擊敗對手，阿謙睇好巴塞作客可以先拔頭籌，讓球盤巴塞小讓平半，阿謙推介上盤。
（周四凌晨4時開賽）
馬體會近期表現有所回落，球隊喺聯賽連和3場，雖然呢3場都係作客賽事，但對手包括中游球隊艾拉維斯同伊巴，馬體會贏唔到波反映球隊狀態唔及早輪咁勇銳。事實上，馬體會陣中仍有唔少傷兵，包括中場堤亞高文迪斯、奧古士圖費南迪斯同埋正選門將奧比歷都唔出得，就算今仗有上場聯賽休息嘅前鋒基沙文可以復出，但以球隊近期嘅走勢，要頂住巴塞嘅攻擊絕非易事。
球證誤判玩謝地上最強
巴塞上仗對貝迪斯，因為球證未有發現貝迪斯球員喺龍門白界內解圍，令球隊只能同對手打和，一眾球員自然谷住度氣。巴塞雖然仍有中場恩尼斯達、布斯基斯同拉芬拿艾簡達拿因傷缺陣，但中場小將丹尼斯蘇亞雷斯表現日趨成熟，上圈次回合對皇家蘇斯達更梅開二度；加上「MSN」美斯、蘇亞雷斯同尼馬近況唔錯，而且球隊近6次作客馬體會錄得3勝1和2負唔算處於下風，2015年西盃就曾經作客贏3比2，阿謙睇好今場有機會歷史重演。