今晚英超早場，聯賽榜「3哥」利物浦主場迎戰包尾大幡史雲斯。利物浦連續2場聯賽失分，已被榜首車路士甩開7分，適逢今場對手只係近6場聯賽輸5場嘅史雲斯，紅軍係時候贏番場漂亮勝仗，讓球半、兩球照捧上盤。
（Now 621及LeSportsHK應用程式周六晚8時30分直播）
利物浦近期戰績一般，周中喺英足盃重賽以1比0擊敗普利茅夫只係佢哋近5仗比賽首場勝仗，不過其實兩場英足盃紅軍只係出副選，另外兩場英超就先後作客出戰，失分絕對情有可原。紅軍今季喺晏菲路水準有保證，9場聯賽取得7勝2和，強如曼城都係佢哋手下敗將。塞內加爾快翼沙迪奧文尼因出戰非國盃繼續缺陣，幸好另一進攻好手菲臘比古天奴已傷愈復出，狀態逐漸上力，加埋同胞羅拔圖法明奴和近況弗爆嘅拉爾拉拿，呢個進攻三叉戟一樣咁煞食。
史雲斯由新帥保羅基文迪接手後表現有好轉，可惜拍埋強隊始終冇得揮，上仗主場對阿仙奴兵敗如山倒輸夠4球，佢哋對上9仗聯賽一共失咗27球，而且對上4次聯賽輸波全部至少輸3球，豆腐渣防線完全任人魚肉，對住如狼似虎嘅紅軍等做炮灰，上盤讓球半、兩球都冇有怕。