在加蓬舉行嘅非國盃，B組周一凌晨上演2場大戰，呢組除津巴布韋實力最弱外，阿爾及利亞、突尼西亞同塞內加爾都係實力分子。有馬列斯領軍嘅阿爾及利亞火力冠絕全非洲，今晚先鬥「陪跑格」嘅津巴布韋肯定想大開殺戒，考慮到主勝太熱冇肉食，不如博2.15倍入球大仲好路！（TVB 302周一凌晨零時直播）
外圍賽6戰勁入25粒
阿爾及利亞中前場球星如雲，效力李斯特城嘅馬列斯同施利文尼當然最受注目，波圖翼鋒巴謙美同史浩克04嘅賓特納亦喺所屬球會獨當一面，即使中場施列迪泰達因傷退隊，但補選咗阿仙奴小將賓拿沙，論攻擊陣容依然係今屆最強嗰隊。阿爾及利亞喺外圍賽已頻頻大開殺戒，6仗外圍賽狂入25球，非常恐怖。
事實上，阿爾及利亞喺非國盃前一直保持強大火力，近10仗賽事合共轟入38球，有8仗總入球達4球或以上，相信球隊唔會突然改變強攻戰術。津巴布韋喺飛赴加蓬前，球員一度因獎金分配問題拒絕上機，可見球隊內部問題多多，加上本身實力遠遜對手，今次參賽志在學習，有入波已經有交代啦！
突尼西亞受讓食「塞」
至於另外兩支有力爭出線資格嘅突尼西亞同塞內加爾交鋒，論球隊星光程度，幾乎全隊都喺歐洲球會搵食嘅塞內加爾肯定較受注目，不過突尼西亞以整體戰見稱，而且每逢大賽都特別醒神，過去7屆賽事就有5屆至少殺入8強，近5次對塞內加爾亦有2勝3和佳績，今仗受讓當然要捧讓球主勝。（周一凌晨3時開賽、馬會網上文字直播）