西甲上演榜首大戰，異軍突起嘅西維爾主場鬥「一哥」皇家馬德里，雙方剛過去周中西班牙盃16強次回合交鋒，皇馬收起C朗等多位主力，仍能作客逼和3比3，並成功晉級，教練施丹今仗會派強陣出擊，亦係C朗當選世界足球先生後首次披甲，當然要入波顯身價，可望再演入球騷，捧中位數3.5球入球大。（Now 632周一凌晨3時45分直播）
皇馬上仗西盃收起C朗、莫迪歷，賓施馬亦僅後備上陣，球隊仍然可以兩度落後下，逼和西維爾3比3，創下西班牙球壇最長紀錄40場不敗，認真犀利。「銀河艦隊」副選都可以攻入西維爾3球，更何況今仗有埋C朗復出，火力肯定更強橫。
西盃剛駁火合轟6粒
西維爾今季由阿根廷名帥森柏奧利執教後，表現升呢，未計昨晚賽事，以1分優勢力壓巴塞隆拿排第2位。雖然仲落後皇馬4分兼踢多1場，但起碼已經打破近年由皇馬、巴塞、馬體會壟斷前3位局面。皆因西維爾喺自己地頭表現佳，今季8場聯賽主場取得7勝1負，唯一敗仗係1比2不敵巴塞，當時西維爾先開紀錄，雖敗不辱。
同埋西維爾近5次主場對皇馬，取得3勝1和1負，並唔輸蝕，加上新兵祖維迪上仗西盃首次上陣，即射破皇馬大門，表現有料到。西維爾今仗要好好把握機會爭勝，拉近同皇馬積分差距，勢必拚盡一搏，有利製造入球。事實上，兩隊近6次對壘，有5次總入球達4球或以上，中位數3.5球大盤值博。