鬥剛果例演入球騷
非洲國家盃C組賽事，上屆冠軍科特迪瓦將會大戰剛果民主共和國。科特迪瓦上仗僅同多哥踢成0比0平手，現時落後榜首剛果民主共和國兩分，今仗如果贏唔到波，出線形勢將會陷入危機，因此勢必主攻搶分。至於剛果民主共和國踢法同樣進取，雙方近7次對賽總入球都達到3球或以上，今仗隨時又會上演入球騷，阿謙推介中位數2.5球嘅大盤。
（TVB 302周六凌晨零時直播）
科特迪瓦上仗雖然唔能夠入到波，但球隊控球率高達六成，形勢係佔盡上風，可惜因為一眾球員腳風欠順，白白錯失贏波機會。科特迪瓦班星級球員經過「熱身」後，相信已經開始上力。事實上，科特迪瓦陣中球星如雲，史篤城前鋒韋菲特邦尼、水晶宮翼鋒韋費特沙夏、哈化柏林射手沙洛文卡勞等，都喺歐洲主流聯賽獨當一面，今仗只要加強攻勢，要入波甚至贏波嘅機會仍然非常樂觀。
近7交鋒場均3球或以上
至於剛果民主共和國上仗以1比0小勝摩洛哥，由於球隊喺比賽末段有球員被逐，無奈被逼屯重兵防守，否則入球應該唔只1粒。其實剛果民主共和國過往對住科特迪瓦都經常出現大比數賽果，兩隊近7次交手總入球都達到3球或以上，包括上屆非國盃4強科特迪瓦贏3比1，今仗中位數2.5球嘅大盤值得支持。