西班牙盃8強首回合，巴塞隆拿作客「凶地」皇家蘇斯達睇怕危危乎！「地上最強」巴塞隆拿一向無堅不摧，惟獨去到蘇斯達主場安奴達球場就冇晒符，佢哋近8次作客蘇斯達錄得3和5負劣績，加上球王美斯續約問題遲遲未有進展，巴塞隱憂重重，讓波信唔過，皇家蘇斯達讓球主勝有2.52倍值博。
（周五凌晨4時15分開賽）
今季西甲有兩支球隊表現令人驚喜，一支係西維爾，另一支就係現時位居聯賽榜第5嘅皇家蘇斯達。呢支巴斯克地區球隊，同畢爾包一樣，基於歷史背景及政治原因，地方色彩濃厚，每次主場出擊，表現都特別醒神，包括今季曾於主場以2比0擊敗馬體會，以及打和巴塞隆拿1比1，延續主場剋死「地上最強」嘅定律。加上皇家蘇斯達教練沙基斯坦球員時代曾於1988至95年效力巴塞長達7年。掛靴之後擔任過巴塞助教及B隊教練，合共近10年，對「地上最強」瞭若指掌。兩項因素配合，蘇斯達有力立於不敗之地。
關係破裂曼城乘機撬球王
巴塞隆拿取得兩連勝，似有回勇迹像，但要留意呢兩場勝仗都係主場，今次去到「凶地」未必發到圍。事實上，巴塞內部有唔少隱憂，先係盛傳教練安歷基將於今季結束後離隊，近日又爆出美斯可能唔續約；英國《太陽報》甚至從曼城方面取得消息，指巴塞願意傾美斯轉會事宜，令人懷疑呢位阿根廷球王已同會方關係破裂，難怪巴塞今季成績走晒樣。
仲有呀，巴塞中場拉芬拿艾簡達拿因為右腳肌肉受傷，無緣今場比賽。呢位23歲巴西國腳今季西甲入波仲多過尼馬，佢缺陣之下，巴塞更加難打破宿命。