今晚英超爆發傳統「雙紅會」，曼聯奧脫福主場迎戰利物浦！由高普領軍第二季嘅「紅軍」，今季表現令人眼前一亮；至於主隊「紅魔鬼」更係氣勢如虹，近期於各項賽事取得9連勝。兩軍今晚狹路相逢，首循環兩隊踢成0比0，今晚甚有機會和氣收場，3.2倍和局係信心之選。（Now 621及LeSports HK應用程式周一凌晨零時直播）
曼聯9連勝魔性回歸
近期錄得9連勝嘅曼聯，當中有6仗屬於聯賽，演出絕對係「魔性回歸」，球隊最近仲有兩大利好消息振奮士氣，首先就係上年12月26號拆禮物日對新特蘭一仗中，門前以「蠍子式」後腳入波嘅中場米希達利恩，以呢個靚絕入波拎咗12月英超最佳入球獎，認真威水！而近12場比賽射入12球嘅伊巴謙莫域，亦當選12月最佳球員，雖然呢位神鋒早前喺英聯盃突然因病缺陣。不過領隊莫連奴向魔迷大派定心丸，斬釘截鐵話佢今晚一定可以披甲。「寸王」仲話自己同高普一樣有一團火，都係好想拎到成績嘅人，但講到冷靜，佢就認為對方及唔上自己。
利記傷疲盡起搏甩髀
「紅軍」利物浦今季表現Sharp醒，由開季至今20戰取得13勝5和2負佳績，未計尋晚賽事僅落後榜首車路士5分，「紅軍」今季火力驚人，20場聯賽轟入48球屬英超之最，加上今仗傷疲盡起，隊長佐敦軒達臣自月初受傷後已復操，今晚可以候命統領球隊；而進攻靈魂菲臘比古天奴及中堅祖爾麥迪比亦同樣脫離傷兵名單，令球隊前後實力大為提升。雖然紅軍近3仗不勝稍見回落，但今晚面對傳統死敵曼聯，全隊上下勢必加多兩錢肉緊搏甩髀，和局可以話係明智之選。