今日澳職只演一仗，由排第3嘅墨爾本城主場對包尾大幡中岸水手。墨爾本城近期表現反覆，球隊喺積分榜遠遠落後榜首嘅FC悉尼，再唔急起直追就無望爭奪常規賽冠軍，嚟緊賽事相信都會踢得好積極。至於中岸水手近7仗只得1和6負狀態甚曳，而且呢7場比賽半場已經落後，可見佢哋上半場精神非常唔集中，阿謙今仗推介1.57倍嘅墨爾本城半場勝。
（有線64及203台周四下午4時50分直播）
積極搶分追榜首
墨爾本城季前獲得重量級球星卡希爾加盟，配合上季神射手科拿路利，本來希望有一番作為。不過，墨爾本城踢完半季除咗喺澳足盃封王外，聯賽表現未如理想，現時落後榜首FC悉尼14分，相信球隊係時候要搶分收窄差距。墨爾本城今仗有中場基爾堅尼停賽期滿復出，配合卡希爾同科拿路利等猛將，有力攻破對手大門。
中岸水手近況比墨爾本城更差，近7場聯賽錄得1和6負劣績，球隊喺老將泰華利斯及積基斯法迪缺陣下頻頻失分。水手今季踢咗15場聯賽，竟然有12場賽事喺上半場就畀對手攻破大門處於落後劣勢，可見呢班波喺比賽初段非常唔集中，今仗面對火力強勁嘅墨爾本城，相信半場都未必頂得住，一於捧墨爾本城半場勝。