畿內亞比紹遇強必縮
兩年一度嘅非洲國家盃今晚拉開戰幔，揭幕戰由東道主加蓬主場火併畿內亞比紹。加蓬有非國盃5朝元老兼多蒙特王牌奧巴美揚壓陣，自然被睇高一線，可惜隊友質素參差，面對刻意死守嘅畿內亞比紹，隨時老鼠拉龜冇碇埋手，頂盡係小勝格局，轉捧入球細好過。
（周日凌晨零時開賽，馬會網上文字直播）
講到加蓬最具星味球員，非隊長奧巴美揚莫屬，唔好睇呢位多蒙特前鋒只得27歲，佢之前已曾4次參加非國盃決賽周，包括2012年同赤道畿內亞合辦嗰次，單計近7仗加蓬嘅非國盃決賽周賽事嘅9個入波，奧巴美揚就佔咗4球，可見佢哋對呢位快將成為非國盃5朝元老極度倚賴。雖然加蓬今屆以外流球員為主，但好似新特蘭中場迪迪亞尼當、祖雲達斯中場勒美拿、卡迪夫城後衞伊古利文加等質素一般，其餘萊特柏倫、祖漢奧比安及艾賓丹高耶都只喺法乙搵食，特別係次席射手艾武拿效力中超FC天津（天津泰達）之流，質素有幾高心照啦。
近3屆東道主首戰少交收
另一邊廂，畿內亞比紹今次係首度參加大賽決賽周，毫無經驗可言，而陣中球員比加蓬更冇名氣，大部分混迹於葡超及更低組別聯賽，完全未見過大場面。因此，論實力畿軍明顯技遜一籌，遇強勢必玩死守，希望人人走多步創造奇迹，加蓬又不擅主攻，近期入球亦偏少，今仗最多小勝，唔慌多波入，加上近3屆4支東道主首仗比賽，無獨有偶總入球皆少過3球，包括2012年與赤道畿內亞合辦嘅加蓬，首仗小勝尼日爾2比0，一於捧細盤。