非洲兵缺陣「狐狸」濕滯
非洲國家盃今日開鑼，意味唔少非洲兵會缺席英超，當中李斯特城可謂重災區，共有3名主力缺陣，反觀近年倚重非洲兵嘅車仔冇受影響，今仗更可夫添作戰，樂比相信車仔可收拾13連勝斷纜嘅心情，重返正軌，作客「狐狸」讓半一，照捧1.77倍嘅上盤。
（Now 621及LeSports HK應用程式周日凌晨1時30分直播）
李斯特城今仗有馬列斯、施利文尼及艾馬迪幾位非洲兵缺陣，當中以冇咗馬列斯打擊最大，呢位應屆非洲足球先生屬球隊進攻核心，上季貢獻17球及11次助攻，今季亦進帳7球及3次助攻。冇咗佢嘅供應，射手占美華迪發揮肯定受影響，至於施利文尼係球隊主場入波最多球員，況且加納中場艾馬迪亦係常規主力，雲尼亞里要重新排陣肯定頭痛。
簡迪轉投車仔 此消彼長
衞冕嘅李斯特城今季喺聯賽發揮並唔理想，雖然暫時脫離降班漩渦，但已冇晒上季嘅「神奇氣味」，其中最大原因係防中尼高路簡迪轉投今仗對手車路士，令防線弱點表露無遺。李斯特城今季聯賽失咗31球，係車仔一倍有多，其中對利物浦及曼聯失4球，首循環作客車仔亦吞3蛋，可見「狐狸」今季對親攻力強嘅球隊都出事。
藍戰士連勝斷纜極速反彈
車路士連勝紀錄雖然被打斷，但反而可放低包袱，畢竟作客輸畀熱刺唔係咩接受唔到嘅戰果，而且車仔喺之後嘅足總盃即反彈大勝彼德堡4比1，可見士氣冇受影響。車路士今季最值得欣賞係球員長期保持良好狀態，進攻孖寶迪亞高哥斯達同夏薩特入球停不了，踢到季中表現未見走樣，經過上場足總盃休息叉電後，相信今場又嚟料，讓半一照捧可也！