生牯仔闖普利茅夫鐵桶陣
英格蘭足總盃向來被稱為「爆冷溫床」，今晚英乙「雜牌軍」普利茅夫喺英足盃第3圈重賽主場迎戰利物浦，未落場已經贏晒。普利茅夫上仗用血肉長城頂住「紅軍」，今仗喺臨時擴建嘅主場再出擊，「第12人」力量更勁。利物浦用生牯仔擔正嫌太幼嫩，大炒機會唔高，入球細(3/3.5球)更值得捧場。
（周四凌晨3時45分開賽）
上次交鋒利物浦派出大量青年軍上陣，平均年齡僅得21歲零296日，係「紅軍」史上最年輕陣容，擔正前鋒嘅活賓同舒爾奧祖等新星雖然有潛質，但上仗喺晏菲路球場面對龜縮普利茅夫，就算有77%控球率同28次射門，都中龍4次兼且0入波，證明經驗同火喉都仲未夠，反映對住好氣好力嘅對手都拎唔到任何甜頭。
年輕鋒將把握力差
利物浦啱啱喺英超同曼聯激戰完，主力攻擊球員沙迪奧文尼又去咗踢非國盃，嚟緊星期六英超又要踢早場，一連串問題之下，領隊高普一定唔會畀拉爾拉拿、羅拔圖法明奴同大傷初愈嘅菲臘比古天奴冒險，今場比賽好可能同上次交鋒一樣，戰情唔對路先至喺下半場中段換主力落場，因此紅軍就算最終獲晉級資格，但都唔似可以大勝。
普軍加座位發揮12人力量
普利茅夫今次可以返主場踢重賽，對佢哋嚟講已經「冇得輸」，因為今場重賽喺英國被列入全國直播賽事，據報呢支英乙仔今屆足總盃之旅已進帳100萬鎊，球會仲宣布會為今仗臨時加建1,800個座位，全場17,000張波飛晨早賣晒。普利茅夫對上一次主場爆棚已經係2010年，喺英足總第3圈越級挑戰紐卡素，該仗普利茅夫亦成功守和0比0，「第12人」力量唔講得笑。
普利茅夫依家喺英乙排第2位，主場成績亦突出，對上9仗主場賽事只係輸過1仗，有4勝4和1負嘅佳績，今仗喺自己地頭做「大丈夫」，屯重兵死守下有能力抵禦利物浦青年軍，就算最終出局都唔會畀「紅軍」羞辱，主場之利可望踢出漂亮一仗。